ಹಿಂಗೊಂದು ವಿಚಾರ!

ಇದೊಂದು ವಿಚಾರ ನಮ್ಮ ನಂಬುಗೆಯನ್ನು ಕುರಿತಾದದ್ದು.

ಬೆಳಗೆರೆ ಕೃಷ್ಣಶಾಸ್ತ್ರಿಯವರ ’ಯೇಗ್ದಾಗೆಲ್ಲಾ ಐತೆ’ ಪುಸ್ತಕದಲ್ಲಿ ಬರುವ ಮುಕುಂದೂರು ಸ್ವಾಮಿಗಳ ಒಂದು ವಿಚಾರಧಾರೆ ಬಹಳ ಸೊಗಸಾದದ್ದು. 

ಒಮ್ಮೆ ಮುಕುಂದೂರು ಸ್ವಾಮಿಗಳು ಮತ್ತು ಶಾಸ್ತ್ರಿಗಳು ಬೆಟ್ಟದ ಮೇಲಿನ ದೇವಸ್ಥಾನ ನೋಡಿಕೊಂಡು ರಾತ್ರಿ ಅಲ್ಲಿಯೇ ಉಳಿದಿರುತ್ತಾರೆ. ಆ ಕಡೆ ಬಂದ ಊರಿನವನೊಬ್ಬ ಸ್ವಾಮಿಗಳ ಕಂಡು  ಊರಿಗೆ ಬರಬೇಕೆಂದು ಬಲವಂತ ಪಡಿಸುತ್ತಾನೆ. ಮತ್ತೊಮ್ಮೆ ಬರುವೆ ಎಂದು ಹೇಳಿದರು ಬಿಡದೆ ಕರೆಯುತ್ತಿದ್ದವನನ್ನು ಸಮಾಧಾನ ಪಡಿಸುತ್ತಾ, ಆತನೊಂದಿಗೆ: 

"ಅಲ್ಲೋ ಅಪ್ಪಯ್ಯ! ಇದ್ದು ಇದ್ದು ಸನ್ಯಾಶೀನ ಬುಧವಾರ, ಅದರಾಗೂ ರಾತ್ರಿವೇಳೇ ಬಾಳಿ ಬದುಕೋ ಮನಿಗೆ ಕರ್ಕೊ‍ಂಡು ವೋಗಬೌದೇನೋ! ಏನೋ ಸ್ವ್ಯಾಮಿಗಳು ಮನೆಗೆ ಬರಲಿ ಅಂತಾನೆ ಒಳ್ಳೇ ಭಕ್ತಿಯಿಂದ ಕರೀತಾನೆ. ಆದ್ರೆ ನಾವು ತಿಳ್ದು ತಿಳ್ದೂ ವೋಗಬೌದೇನಪ್ಪ ಒಳ್ಳೇ ಬುಧವಾರ". ಅಂತ ಹೇಳಿ ಅವನನ್ನು ವಾಪಸ್ಸು ಕಳಿಸುತ್ತಾರೆ.

ನಂತರ ನಗುತ್ತಾ ಬೆಳಗೆರೆ ಶಾಸ್ತ್ರಿಗಳ ಬಳಿ ಹೆಳ್ತಾರೆ, "ನೋಡ್ದೇನಪ್ಪಾ ಸುಳ್ಳು ಎಷ್ಟು ಚೆನ್ನಾಗಿ ಇಡಿಯುತ್ತೆ ಜನಕ್ಕೆ? ಜನ ದೇವರ ಸೇವೇನೂ ಮಾಡ್ತಾರೆ, ಸ್ವಾಮಿಗಳ ಸೇವೇನೂ ಮಾಡ್ತಾರೆ, ಕೈಲಾದ ಕರ್ಚುಮಾಡಿ ಕಾಣಿಕೆ, ಪಾದಪೂಜೆ ಎಲ್ಲಾ ಮಾಡ್ತಾರೆ. ಅದೆಲ್ಲಾ ತಮಗೆ ಒಳ್ಳೇದಾಗೋದಾದ್ರೆ ಸರಿ. ಸ್ವಾಮಿಗಳು ನನ್ನ ಮನೆಗೆ ಬಂದಿದ್ರು ಅಂಬೋ ಯೆಸರುವಾಸಿ ಆಗಾಕೂ ಸರಿ. ಅಲ್ಲಿವರಗೆ ಎಲ್ಲಾ ಪಸಂದೇ. ಆದರೆ ಏನಾದ್ರೂ ಸ್ವಲ್ಪ ಕೆಡಕಾಗುತ್ತೆ 
ಅಂದ್ರೆ ನಿನ್ನ ಸ್ವಾಮಿಗಳು ಬ್ಯಾಡ, ದೇವರೂ ಬ್ಯಾಡ. (ನಗುತ್ತಾ) ನೋಡು ಈ ಗುಡಿಯೊಳಗೆ ದೇವರೈತೆ ಅನ್ನು. ಇದ್ದೀತು ಗುಡಿ ಅಂದ ಮ್ಯಾಲೆ. ಅದರಾಗೊಂದು ದೇವರು ಇಟ್ಟಿತ್ರಾರೆ. ಅದೇನು ದೊಡ್ಡ ವಿಚಾರ ಅಂತ ಏನೋ ತಿರಸ್ಕಾರವಾಗಿ ಅಂದುಬಿಡ್ತಾರೆ. ಇವರ ಲೆಕ್ಕದಾಗೆ ಅಲ್ಲಿರೋ ಗೊಂಬೇನೇ ದೇವ್ರು. ಆದರೆ ಅದೇ ಪಕ್ಕದಾಗಿರೋ ಅಳ್ಳಿ ಮರದಾಗೆ ದೆವ್ವ ಐತೆ ಅನ್ನು ತಕ್ಷಣವೇ ಬೆಚ್ಚಿ ಬೀಳ್ತಾರೆ. ಅತ್ಕಡೆ ತಿರುಗಿ ನೋಡಾಕೂ ಭಯ! ದೆವ್ವ ಅಂದ್ರೆ ಅಷ್ಟು ಸತ್ಯ. ಇವ್ರಿಗೆಲ್ಲಾ ದೇವ್ರು ಅಂದ್ರೆ ಅದೇನು ಬಿಡು ಅಂತ ಲೆಕ್ಕಕ್ಕೆ ತಕೊಂಬಲ್ಲ, (ನಗುತ್ತಾ) ಯಂಗೈತಪ್ಪಾ ಲೋಕ? ಅಂತ ವಿಸ್ಮಯ ಪಡುತ್ತಾರೆ.

ನಿಜ ಅಲ್ವಾ! ಅವರು ಹೇಳಿದ ಒಂದ್ಮಾತು ಸ್ವಾನುಭವಕ್ಕೆ ಬಂದ ಒಂದು ಘಟನೆ.

ನಮ್ಮ ಮನೆಯ ದೇವ್ರು ಶ್ರೀ ಆಂಜನೇಯ ಸ್ವಾಮಿ, ನಮ್ಗೆ ತೋರಿದ ರೀತಿಯಲ್ಲಿ ಪೂಜೆ ಮಾಡ್ಕೊಂಡು ಬರ್ತಿದ್ವಪ್ಪಾ. ಒಂದ್ಸಾರಿ ಯಾರೋ ತಿಳಿದವ್ರು ಹೇಳಿದ್ರು, ರಾಮ ಇಲ್ಲದ ಕಡೆ ಹನುಮ ಇರಲಾರ ಅಂತಾ. ಆಗಲಿಂದಾ ಮನೆಯಾಗೆ ಶ್ರೀರಾಮ ದೇವ್ರ ಪಟ ಮನೆಯಾಗ ಬಂತು, ರಾಮ ನಾಮ ಜಪ ಬಂತು. ಹೊಸ ಭಕ್ತಿ ಕೂಡ ಬಂತು. ಹೊಸ ಮನೆಗೆ ಬಂದ ಮ್ಯಾಲೆ, ದೇವ್ರ ಮನೆಯಾಗೆ ಸ್ರೀರಾಮ, ಸೀತಾ, ಲಕ್ಸ್ಮಣ, ಆಂಜನೇಯ ಇಗ್ರಹವೊಂದು ಇಡಬೇಕೆಂದು ನನ್ನಾಸೆ. ಇತ್ತಾಳೆ ಇಗ್ರಹ ಜಾಸ್ತಿ ದುಡ್ಡಿಂದು ಅಂದ್ಕೋಂಡು ತರಲಿಕ್ಕೆ ಆಗಲಿಲ್ಲ. ಅಗೊಂದಪಾ ಮಣ್ಣಿನ ಮಡಿಕೆ ಅಂಗಡಿಯಾಗೆ ಬೊಂಬೆಯೊಂದು ತೆಗೊಳ್ಳೋವಾಗ, ರಾಮ, ಸೀತೆ ವಿಗ್ರಹ ಕೇಳ್ದೆ. ಅದಕ್ಕವನು, "ರಾಮಂಗೆ ಪಟ್ಟ ಕಟ್ಟಿದ ಮ್ಯಾಲೆ, ಬಂದ ಕಷ್ಟ ಯಾರಿಗೂ ಬೇಡ. ಟಿ.ವಿ.ಯೊಳಗೆ ಅದರ ಬಗ್ಗೆ ಹೇಳಿದ ಮೇಲೆ, ರಾಮನ ವಿಗ್ರಹ ಕೇಳೋರೆ ಇಲ್ಲ ಸ್ವಾಮಿ!" ಅನ್ನಬೇಕಾ!

ಎಲಾ ಇವ್ನ, ವಾಸ್ತು  ವಿಜ್ಞಾನ ಹ್ಯಾಂಗೆ ಹೇಳಿದ್ನಪಾ! ಅವ್ನು ಅಂಗೆ ಹೇಳಿದ ಮ್ಯಾಲೆ ನಂಗೂ ಅಂಗೆ ಅನ್ನಿಸ್ತು. ಏನು ಹೇಳಲಾಗಲಿಲ್ಲ, ದಾರೀಲೆ ವಾಪಸ್ಸು ಬರ್ತಾ ಮುಕುಂದೂರು ಸ್ವಾಮಿಗಳು ಹೇಳಿದ ಮಾತು ನೆಪ್ಪಿಗೆ ಬಂತು. "ಸ್ವಲ್ಪ ಕೆಡಕಾಗುತ್ತೆ ಅಂದ್ರ ನಿನ್ನ ಸ್ವಾಮಿಗಳು ಬ್ಯಾಡ, ದೇವರೂ ಬ್ಯಾಡ!"  ಅಲ್ವಾ!

ರಾಮ ಪಟ್ಟಾಭಿಷೇಕ ಚಿತ್ರಕ್ಕೆ ಕಂಪ್ಯೂಟರಿನಲ್ಲಿ ಕಷ್ಟ ಪಟ್ಟು ಬಣ್ಣ ಹಚ್ಚಿದ್ದೆ, ಪ್ರಿಂಟ್ ಮಾಡಿಸಿ ಚಂದ ಫ್ರೇಮ್ ಮಾಡಿಸಿ ಮನೆಯಾಗೆ ಹಾಕಬೇಕು ಅನ್ಸಿತ್ತು. ಆದರೆ, ಶ್ರೀರಾಮ ಪಟ್ಟ ಕಷ್ಟ, ಪಜೀತಿ ನಮಗಾದರೆ, ಬೇಡಪಾ! 
ಚಿತ್ರಪಟ ಇನ್ನು ಪ್ರಿಂಟ್ ಮಾಡಿಸಬೇಕೋ  ಬೇಡಾ ಅಂತಾ ಯೋಚ್ನೆ.